دعا کرو کہ یہ پودا سدا ہرا ہی لگے

اداسیوں میں بھی چہرہ کھلا کھلا ہی لگے

وہ سادگی نہ کرے کچھ بھی تو ادا ہی لگے

وہ بھول پن ہے کہ بے باکی بھی حیا ہی لگے

یہ زعفرانی پلوور اسی کا حصہ ہے

کوئی جو دوسرا پہنے تو دوسرا ہی لگے

نہیں ہے میرے مقدر میں روشنی نہ سہی

یہ کھڑکی کھولو ذرا صبح کی ہوا ہی لگے

عجیب شخص ہے ناراض ہو کے ہنستا ہے

میں چاہتا ہوں خفا ہو تو وہ خفا ہی لگے

حسیں تو اور ہیں لیکن کوئی کہاں تجھ سا

جو دل جلائے بہت پھر بھی دل ربا ہی لگے

ہزاروں بھیس میں پھرتے ہیں رام اور رحیم

کوئی ضروری نہیں ہے بھلا بھلا ہی لگے

بشیر بدر

زبان و ادب کے مشہور شاعر سید محمد بشیر، بشیر بدر کے نام سے مشہور ہیں۔ان کی پیدائش 15 فروری 1935 میں، بھارت کی ریاست اتر پردیش کے شہر کانپور میں ہوئی۔ انہوں نے اعلیٰ تعلیم علی گڑھ مسلم یونیورسٹی حاصل کی۔ اپنی تعلیم اور ملازمت کے دوران علی گڑھ مسلم یونیورسٹی میں مقیم رہے۔ پھر دہلی میں سکونت اختیار کی گھر میں آگ لگنے کے سبب شہر بھوپال منتقل ہو گئے۔ فی الحال بھوپال ہی میں مقیم ہیں۔بشیر بدر نے تقریباً ساٹھ برس مشاعروں کے ذریعے پوری دنیا میں حکمرانی کی۔ اُنہیں 1999ءمیں بھارت کا سب سے بڑا ایوارڈ 'پدما شری' دیا گیا۔ 1999ءمیں ان کی شاعری پر ساہیتہ اکادمی نے انہیں ایوارڈ سے نوازا۔

دعا کرو کہ یہ پودا سدا ہرا ہی لگے

More poems from same author

Unlock the Power of Language & AI

Lughaat

Spell Checker

OCR