Of James Dog [Madame, ye heff a dangerous dog]
The wardraipper of Venus boure,
To giff a doublett he is als doure
As it war of ane futt syd frog:
Madame, ye heff a dangerous dog.
Quhen that I schawe to him your markis,
He turnis to me again and barkis
As he war wirriand ane hog:
Madame, ye heff a dangerous dog.
Quhen that I schawe to him your wrytin,
He girnis that I am red for bytin -
I wald he had ane havye clog:
Madame, ye heff an dangerous dog.
Quhen that I speik till him freindlyk,
He barkis lyk an middling tyk
War chassand cattell throu a bog:
Madam, ye heff a dangerous dog.
He is ane mastive, mekle of mycht,
To keip your wardroippe over nycht
Fra the grytt sowdan Gog Magog:
Madam, ye heff a dangerous dog.
He is ouer mekle to be your messan.
Madam, I red you, get a less an.
His gang garris all your chalmeris schog.
Madam, ye heff a dangerous dog.
58. Of the Aforesaid James Dog
He is na dog, he is a lam
O gracious Princes, guid and fair,
Do weill to James, your wardraipair,
Quhais faythfull bruder maist freind I am:
He is na dog, he is a lam.
Thocht I in ballet did with him bourde,
In malice spack I nevir an woord,
Bot all, my dame, to do you gam:
He is na dog, he is a lam.
Your hienes can nocht gett ane meter
To keip your wardrope, nor discreter
To rewle your robbis and dres the sam:
He is na dog, he is a lam.
The wyff that he had in his innis,
That with the taingis wald braek his schinnis,
I wald schou drownet war in a dam:
He is na dog, he is a lam.
The wyff that wald him kuckald mak,
I wald schou war, bayth syd and back,
Weill batteret with ane barrou tram:
He is na dog, he is an lam.
He hes sa weill doin me obey
In till all thing, thairfoir I pray
That nevir dolour mak him dram:
He is na dog, he is a lam.
